ফুলনি

বহুতো আশা বুকুত বান্ধি ফুলনি পাতলো,

সুগন্ধি ফুল জুপি ফুলনিত ৰোলো ।

অতি যতনৰে  সাৰ-পানী দিলো,

আগ-গুৰিলৈ বুলি সদায় চাই ৰলো ।

লহ-পহকৈ ডাল-পাত ঠন ধৰি উঠিলে,

পাতৰ মাজতে এটি সুন্দৰ কলি মেল খালে,

হঠাৎ কোনে জানো ভাঙি-ছিঙি নিলে ।

উকা কৰি থৈ গ’ল মোৰ ফুলনি খন,

এইয়া হ’ল মালিনীৰ ভাগ্যৰ লিখন ।

কোনেনো বুজিব এই মালিনীৰ দুখ,

নিষ্ঠুৰ নিয়তিয়ে পালে পৰম সুখ ।

নিৰৱে অপেক্ষা কৰিম আকাশলৈ চাই,

গজিব ফুলপাহ ফুলনিত দুনাই ।

তাং:১৪/৬/২০০৫        …………..মন্তি মহন্ত

আইৰ চকুলোৰ নিজৰা

আই মোক কিয় জনম দিলা,

দেউতা মোক কিয় ডাঙৰ কৰিলা ।

ইমান কম বয়সত ভবাই নাছিলো মই,

সুন্দৰ পৃথিবীখন হঠাতে এৰিব লাগিব মই ।

বহুতু আশাকৰি মায়ে জন্ম দিলে,

পঢ়ি শুনি ডাঙৰ হ’লো,

পুত্ৰ সুখ দিবলৈ আগবাঢ়ি যাওঁতে,

আধা বাটতে উজুতি খালো ।

কিনো দোষ কৰিলো একো নাজানিলো,

এই মাথোন তেইচটি বছৰত,

নেদেখা গোঁসায়ে মোকহে দেখিলে

পালোহি মৃত্যু দুৱাৰ মুখত ।

অতি যতনেৰে মায়ে মোক তুলিলে

কোলাই বোকোচাই তুলি,

অতি কষ্টেৰে দেউতাই মোক পঢ়ালে

সৰু চাকৰি এটি কৰি ।

ময়ো বুজি পালো সময় নষ্ট নকৰি

একাগ্ৰতা হ’ল মোৰ লগৰ লগৰী,

পঢ়াশুনা শেষ কৰি চাকৰি মুখি হওঁতেই

কোনে জানো লৈ গ’ল মোক ধৰি বান্ধি ।

মা-দেউতা- বা মোৰ অকনো নকৰিবা দুখ,

মোক নি ভগবানে যদিহে পায় পৰম সুখ ।

একান্ত মনেৰে ভগবানক মাতিবা

পুত্ৰৰূপে পাবলৈ মোক,

অহা জনমত হে পাৰিম ছাগৈ

পৰিশোধ কৰিব তোমলোকৰ সুদ ।

তাং: ৫ মাৰ্চ ২০০৫  …….. স্বৰ্গীয় মাধুৰ্য্য কলিতা

গামোচা

      

গামোচা গামোচা ফুলাম গামোচা,

তোক দেখি দুখ লাগে এনে অৱস্হা ।

গামোচা শুৱনি গুৰু আসনত,

গামোচা শুৱনি সিংহাসনত ।

গামোচা কৱচ ৰূপে যুজাৰুৰ কান্ধত,

গামোচা আইৰ আৰ্শীবাদত ।

গামোচা নামঘৰৰ খুটাত মেৰাই,

গামোচা ভকতৰ ডিঙিত শুৱাই ।

গামোচা আছিল সন্মানৰ প্ৰতীক,

সপোনৰ ফুলৰ চানেকী ৰচি

চেনাই বিহুৱান ৰূপত ।

সেই গামোচা আজি মেখেলা চাদৰত,

গামোচা আজি বহা চোফাৰ কোচনত ।

গামোচা দেখো মহিলাৰ ব্লাউজৰ ৰূপ,

গামোচা দেখো ল’ৰাৰ চোলাৰ ৰূপত ।

এনেবোৰ অপব্যৱহাৰ সহিব নোৱাৰো,

হিয়া ভৰা শ্ৰদ্ধা ভক্তি  গামোচাক জনালোঁ ।

তাং:১২/০৪/২০১৭    …………..মন্তি মহন্ত